विजयपूर जिल्हाधिकारी टी. भुबलन यांची सोन्ना बॅरेजला भेट
पाहणी अधिकाऱ्यांना आवश्यक खबरदारीच्या उपाययोजना करण्याच्या सक्त सूचना
विजयपुर / प्रतिनिधी- दिपक शिंत्रे
जिल्हाधिकारी टी. भुबलन यांनी आज कलबुर्गी जिल्हाधिकारी फौजिया तरन्नुमा यांच्यासह भीमानदीवर बांधण्यात आलेल्या सोन्ना बॅरेजला भेट दिली.
महाराष्ट्रातील उजनी आणि वीरा जलाशयातून वाहत असलेल्या पाण्याच्या पार्श्वभूमीवर भीमा नदीच्या पात्रातील पूरस्थितीबाबत खबरदारी घेण्यासाठी त्यांनी भेट देऊन पाहणी केली. वीरा जलाशय, भीमा नदीपात्रातील नागरिकांनी खबरदारी घ्यावी व संबंधित अधिकाऱ्यांनी दिलेल्या सूचनांचे पालन करावे, अधिकाऱ्यांनी खबरदारीच्या उपाययोजनांबाबत जनजागृती करावी. नदीत कपडे धुणे, गुरे-वासरे यांना नदीपासून दूर ठेवण्याची कार्यवाही करण्याची सूचना त्यांनी केली.
यावेळी त्यांनी बॅरेजच्या सर्व क्रस्ट गेट्सची पाहणी करून भीमा नदीकाठच्या पुरामुळे बाधित झालेल्या गावांची अधिकाऱ्यांकडून माहिती घेऊन आवश्यक ती खबरदारी घेण्याचा सल्ला दिला.
यावेळी कलबुर्गी जिल्हा पंचायतीचे मुख्य कार्यकारी अधिकारी बनवर सिंह मीना, अलमेल तहसीलदार सुरेश चावलार, अफजलपूर तहसीलदार संजीवकुमार दासर, संतोष सज्जन व इतर अधिकारी उपस्थित होते.
